కల్చరా?.. కామన్ సెన్స్ లోపమా?.. అమెరికాలో ఇండియన్ ఫ్యామిలీపై ఫిర్యాదు!

అమెరికాలో నివసిస్తున్న ఓ భారతీయ కుటుంబం తీరుపై పక్కింటి అమెరికన్ చేసిన ఓ రెడిట్ పోస్ట్ ఇప్పుడు నెట్టింట‌ పెద్ద చర్చకు దారితీసింది. సాంస్కృతిక అలవాట్లు, పక్కింటి వారితో నడుచుకోవాల్సిన తీరుపై భిన్నాభిప్రాయాలు వ్యక్తమవుతున్నాయి. తొలుత రెడిట్‌లోని r/Frisco సబ్‌రెడిట్‌లో పోస్ట్ చేయబడిన ఈ ఫిర్యాదు, ఆ తర్వాత స్క్రీన్‌షాట్ల రూపంలో 'ఎక్స్' (గతంలో ట్విట్టర్)లో వైరల్ అయింది.

టెక్సాస్‌లోని ఫ్రిస్కో ప్రాంతంలో నివసిస్తున్న ఓ అమెరికన్ ఈ పోస్ట్ పెట్టారు. తాను ఆస్ట్రేలియా కంపెనీకి రిమోట్‌గా నైట్ షిఫ్టులో పనిచేస్తానని, తెల్లవారుజామున 2 గంటలకు లాగ్ ఆఫ్ అయి, 3 గంటలకు నిద్రపోతానని తెలిపారు. అయితే, తాను నిద్రపోయిన రెండు గంటలకే అంటే ఉదయం 5 గంటలకే తన పక్కింటి భారతీయ కుటుంబం రోజును ప్రారంభిస్తుందని, వారి అరుపులు, శబ్దాలతో తన నిద్రకు భంగం కలుగుతోందని ఆవేదన వ్యక్తం చేశారు.

"ప్రతిరోజూ ఉదయం 5 గంటలకే ఆ కుటుంబ సభ్యులు బయటకు వస్తారు. చుట్టూ నిశ్శబ్దంగా ఉండటంతో వారు మాట్లాడుకునే మాటలు చాలా గట్టిగా వినిపిస్తాయి. ఆ తర్వాత బకెట్లతో నీళ్లు తెచ్చి డ్రైవ్‌వేపై పోస్తారు. ఆ నీళ్లు చిమ్మే శబ్దం, తర్వాత గోడల అవతలి నుంచి కూడా వినిపించేంత గట్టిగా ఊడిచే శబ్దం వస్తుంది. ఇక ఆ తర్వాత వారు రంగురంగుల సుద్దముక్కలతో డ్రైవ్‌వేపై ముగ్గులు వేస్తూ నవ్వుతూ, మాట్లాడుకుంటారు. ఇది సుమారు 20 నుంచి 30 నిమిషాల పాటు సాగుతుంది. వారాంతాల్లో కూడా దీనికి మినహాయింపు లేదు" అని ఆయన తన పోస్టులో వివరించారు.

ఈ సమస్యను పరిష్కరించుకోవడానికి తాను శాంతంగా ప్రయత్నించానని, తన పనివేళల గురించి వారికి వివరించి, శబ్దం తగ్గించమని లేదా కాస్త ఆలస్యంగా వారి పనులు ప్రారంభించమని కోరినట్లు తెలిపారు. అందుకు వారు నవ్వుతూ "మేం రోజూ ఇలాగే చేస్తాం" అని మర్యాదగా చెప్పారే తప్ప, వారి ప్రవర్తనలో ఎలాంటి మార్పు రాలేదని ఆయన వాపోయారు.

ఈ పోస్ట్ వైరల్ కావడంతో నెటిజన్ల నుంచి మిశ్రమ స్పందనలు వ‌స్తున్నాయి. కొంతమంది అమెరికన్ పౌరుడికి మద్దతుగా నిలిచారు. ఉదయం 5 గంటలకు శబ్దం చేయడం, అది సాంస్కృతిక అలవాటు అయినా సరే, స్థానిక నిబంధనలను ఉల్లంఘించడమేనని వాదించారు. చాలా నగరాల్లో ఉదయం 7 గంటల తర్వాతే శబ్దాలకు అనుమతి ఉంటుందని, పోలీసులకు ఫిర్యాదు చేయమని సూచించారు.

మరోవైపు కొంతమంది ప్రవాస భారతీయులు కూడా ఆ కుటుంబం తీరును తప్పుబట్టారు. తెల్లవారుజామునే గట్టిగా మాట్లాడటం, శబ్దాలు చేయడం భారతదేశంలో సాధారణమే కావొచ్చు, కానీ అమెరికా లాంటి నిశ్శబ్ద ప్రదేశాలలో అది పౌర స్పృహ లేకపోవడమే అవుతుందని విమర్శించారు. అయితే, మరికొందరు ఈ కథపై అనుమానం వ్యక్తం చేశారు. ప్రతీరోజూ ఉదయం 5 గంటలకే లేచి, డ్రైవ్‌వే కడిగి, ముగ్గులు పెట్టే కుటుంబం ఉంటుందా అని, ఇది కేవలం కల్పిత కథ కావచ్చని కామెంట్లు చేశారు. మొత్తానికి ఈ ఘటన, విభిన్న సంస్కృతుల ప్రజలు కలిసి జీవించేటప్పుడు ఎదురయ్యే సవాళ్లను, పరస్పర గౌరవం, సర్దుబాటు ఆవశ్యకతను మరోసారి గుర్తుచేసింది.